Jubileumprins Ivo I (Wijnen)

Dat zit biej òs in de femilie!
En dat kin ich inmiddels mit trots al 24 joar zinge, al is ‘t gelieknamige leedje van kartoesj pas 13 joar oad….

Eindelijk moog ich, es 24 joarige hedsjer jong, woeënachtig op de kampsjtroat, van de daken sjrèie dat ich es Prins Ivo de ieësjte vuéropmoog goon tijdens de vasteloavend op os Groeët Ghen Heij. Inne absolute jongensdroeëm dea oetkump en woa ich noe al ontzettend gruëtsj op bin!

Vurrig joar bin ich es roadslid aangesjloate bie de wieëze road van de Bokkeriejesj woa ich in de voetsporen bin getreden van miene pap, André en miene opa zieëliger, Jacob.
Allebei zonger sjtripke achter hun naam, dus neet alleen Ivo de ieësjte, maar ooch de ieësjte prins oet de femilie Wijnen.
Ich goon mien geël zjwarte roadsmutsj dit joar dus effekes verruilen veur ‘n prachtige variant mít veren. Op dizze ruil hub ich stiekem altied waal gehoopt en ich goon ‘m dan ooch mit trots drage.
Vasteloavend dat zit dus waal degelijk in miene genen en hub ich van kleins af aan mitgekregen. Mit mam mit in de optòch, mit opa en oma langs de kant, of es klinge opdonder toch al af en toe stiekem mit pap mit op de bokkewagen. Wat d’r ooch gebuurde, d’r bie woar ich!

Inmiddels bin ich al ‘n diek joar samen mit mien sjat, Myrthe. ‘N meëdje van Heelehei, oet de zeker neet onbekende Braggeleëre femilie!
Mien sjoeënmam Ester heet in 2013 de scepter mooge zjweije es prinses bie de Geête en ooch sjoeënpap Jos is al joare actief es roadslid bie de Bokkeriejesj en heet inmiddels samen mit miene pap ‘n stapje truuk gedoon noa de ieëreroad.
Dus ooch bie heur is de vasteloavend d’r mit de paplepel ingegoote en weere v’r samen van alle kanten gestjeund in ‘t kommende regeringsjoar.

Mien basisjoeltieëd hub ich doorgemak op de Ganzerik op Heelehei, woa ich ooch es sjoeëlprins heel get joare geleëje al ‘ns hub kinne ervaren wie ‘t is om mit ‘n scepter te mooge zjweije. Hienoa volgde mien middelbare sjoeëlperiode op ‘t Herlecollege in Heële en ‘t Romboutscollege in Broenssem. Doanoa hub ich mien MBO opleiding (Audiovisule productie) gevolgd aan ‘t Arcuscollege in Heële.

Noa mien sjtudie bin ich ‘t werkveld ingerold en hub ich ‘n sjtart gemàk aan mien carrière bie onger angere Wealer autogroep in Heële es Aftersales-adviseur en bie Trebs/Lenco in Nuth op de afdeling marketing en communicatie.
Pas geleeje hub ich veur michzelf besjloate om ‘n nuuje stap te goon zetten in mien nog jonge leëve en bin ich noa ‘n intensieve sollicitatieprocedure aangenomme bie de Nationale politie woavuérich eind januari de opleiding goon volgen in Eindhoven.

Neève mien werk, aankommende sjtudie en ‘t prinsesjap, bin ich ooch nog erg actief in ‘t verenigingsleëve. Ich bin ‘n aantal joare actief geweês es lid van de drumband van de kuëninklijke sjutterie St. Sebastiaan. Hie bin ich vurrig joar mit gesjtopt om get mieër tieëd vrieë te krieëge in miene agenda. Ooch bin ich al joare actief es kaderlid bie voetbalvereniging Groenester, woa ich onger angere es stadionspeaker zurrìg veur de sjtùm en de meziek tijdens de thoeëswedstrijden van ‘t ieësjte elftal in de Hoofdklasse. Ich bin lid van de stichting bijzondere festiviteiten (SBF), woabiej de organisaásie van de Hedsjer Herrensitzung en de Buuteoavend op Heëlehei centraal sjteet.
Doaneêve veul ich mich nauw betrokke biej versjillende evenementen op Heëlehei woa ich geèr mien sjteentje aan biejdraag.

Verder bin ich geer bezig mit meziek, uiteraard mit name vasteloavesmeziek!
Kin geneête van mooie momente mit miene femilie en mit mien vriendin en goon geer ‘n pilske drinken mit mien vrung.

Ich maak al joare deel oeët van ‘n fantastisch sjieke groep vrung die zichzelf ooch waal ‘s “De Miesers van GhenHeij” néume. Sjtuk veur sjtuk geweldige jongens, dus een van de lestigste keuzes veur mich de aafgeloòpe moande woor dan ooch om d’r hie ínne oet te keeze dee mich es adjudant zou goon biesjtoan. Toch is ‘t gelukt en hub ich gekooze om Yves Quaedvlieg dizze rol te geêve. De res van deès mannen zullen d’r ontgetwieëfeld altied biej zeen, mit of zonger troät.

Leéf luuj, ich hub dr ontzettend veul zin in!
Samen mit de Bokkeriejesj en zeer zeker ooch samen mit alle vasteloavesgekke op Heëlehei en ver doa boeëte goon v’r d’r ‘n manjefiek en onvergeêtelik joar van maken.
Ich bin gruëtsj dat ich dizze vasteloavend es prins veurop moog goon.

V’r hubbe mit z’n alle ‘n fieëske te vieëre woa ‘n hieële dieke goúwe rand omheer zit!

11×11 joar Bokkeriejesj ònger ‘t motto #Zoeëdeessedat, vieërt gieër mit mich mit?

Alaaf!

Ùche Jubileumprins,
Ivo d’r ieësjte